यूएईविरुद्ध टस जितेर नेपालको ब्याटिङ, सुपर सिक्स यात्रामा विजयी सुरुआतको लक्ष्य

आईसीसी टी–२० विश्वकप एसिया एण्ड ईएपी छनोटको सुपर सिक्स चरणमा नेपालले आफ्नो अभियान यूएईविरुद्धको खेलबाट सुरु गर्दै टस जितेको छ। ओमानको अल अमारेत ग्राण्ड मैदानमा हुने खेलमा नेपाली कप्तान रोहित पौडेलले पहिले ब्याटिङ गर्ने निर्णय गरेका छन्।

नेपालले समूह चरणमा जापानमाथि सहज जित निकालेको टोलीमै विश्वास राख्दै खेलाडी संयोजनमा कुनै परिवर्तन नगरेको छ। सोही टोली आज पुनः मैदानमा उत्रिने छ।

सुपर सिक्सको यो पहिलो खेल नेपाली समयअनुसार साँझ सवा ४ बजे सुरु हुनेछ। नेपालका लागि यो खेल विश्वकपमा पुग्ने लक्ष्यतर्फ महत्वपूर्ण मानिएको छ, जसमा टस जित्दै ब्याटिङ रोज्नु रणनीतिक सुरुआतको रूपमा हेरिएको छ।